Môr-ladron, tywysogesau a minions…mae’n Ddiwrnod y Llyfr
Môr-ladron, tywysogesau a minions oedd rhai yn unig o’r cymeriadau lliwgar a welwyd yng Nghanolfan Dylan Thomas ddydd Iau diwethaf wrth i ni ddathlu Diwrnod y Llyfr.
Gellid clywed sŵn straeon a chwerthin 60 o blant cyffrous o Ysgol Gynradd Casllwchwr a oedd yn ymweld â’r ganolfan, wedi’u gwisgo’n lliwgar fel cymeriadau o’u hoff lyfrau.
Bu disgyblion blwyddyn tri a phedwar yn mwynhau teithiau tywys o’r arddangosfa ‘Dwlu ar y Geiriau’ a oedd yn archwilio bywyd a gwaith Dylan Thomas drwy arddangosiadau rhyngweithiol, recordiadau sain a gwrthrychau cysylltiedig.
Creu straeon yn y ardal ddysgu
Fe’u croesawyd hefyd i’n hardal ddysgu ddynodedig lle cawsant eu hannog i greu eu straeon a’u cerddi creadigol eu hunain mewn gweithdy ysgrifennu creadigol arbennig a arweiniwyd gan yr awdur a’r cartwnydd, Sion Tomos Owen.
“Mae’r plant wedi mwynhau dod i adnabod Dylan Thomas, ei fywyd a rhai o’i weithiau.
“Mae’r arddangosfa’n addysgiadol ac yn ddiddan, ac mae tîm addysg y ganolfan wedi cyflwyno detholiad o weithgareddau sydd wedi ysbrydoli meddyliau ifanc ein disgyblion, gan roi hyder iddynt greu eu straeon a’u cerddi eu hunain.
“Mae mynd â dysgu allan o’r ystafell ddosbarth i amgylcheddau megis arddangosfa Dylan Thomas yn ysgogi plant mewn ffordd wahanol, gan helpu i wella cyrhaeddiad disgyblion.”
Mr Rhys Sandels, Ysgol Gynradd Casllwchwr (a ddaeth wedi gwisgo fel Mr Cadno Campus!)
Bu teuluoedd yn mwynhau’r hwyl hefyd!
Nid pobl ifanc Casllwchwr oedd yr unig rai i fwynhau hwyl Diwrnod y Llyfr yn y ganolfan. Yn y prynhawn, cawsom sesiynau galw heibio lle gwahoddwyd teuluoedd i greu eu llyfrau eu hunain i’w llenwi â straeon. Roedd llawer wedi paentio eu hwynebau fel cymeriadau o lyfrau, megis Mog a’r Teigr a ddaeth i de!
Rhywbeth poblogaidd ymysg y gweithgareddau ar gynnig yn Ardal Ddysgu’r Ganolfan oedd y pypedau anifeiliaid. Mae’r pypedau’n cynrychioli rhai o’r anifeiliaid sy’n cael eu cynnwys ym marddoniaeth Dylan a gellir eu gweld ar y llwybr i blant yn yr arddangosfa, megis y falwoden o ‘Poem in October’ Dylan, sy’n darllen ‘the sea wet church the size of a snail’ neu gigfran o’r llinell ‘Hearing the raven cough in winter sticks’.
“Mae pawb yn gwybod bod y gallu i ddarllen ac ysgrifennu’n helpu pobl i ddatblygu mewn bywyd, ond bellach mae tystiolaeth gynyddol fod darllen er pleser yn gallu gwella lles pobl drwy gydol eu bywyd hefyd.
“Mae digwyddiadau fel Diwrnod y Llyfr yn cynnig ffordd llawn hwyl a chyffrous i bobl fwynhau darllen, ac rwy’n falch ein bod yn gallu rhoi cyfle i blant ifanc a’u teuluoedd gymryd rhan.”
Y Cynghorydd Mark Child, Aelod y Cabinet dros Les a Dinas Iach, Dinas a Sir Abertawe
Tynnu dysgu allan o’r ystafell ddosbarth i ysbrydoli meddyliau ifanc
Mae’r arddangosfa ‘Dwlu ar y Geiriau’ yn archwilio bywyd a gwaith Dylan drwy arddangosfeydd rhyngweithiol, recordiadau a gwrthrychau cysylltiedig. Drwy ardal ddysgu ddynodedig, rydym yn gallu rhoi cyfle i ysgolion lleol ddod i ddysgu y tu allan i’r ystafell ddosbarth, i ddod i adnabod Dylan yn well mewn ffordd hwyliog, ac i helpu plant ifanc i ddatblygu eu sgiliau llythrennedd.
“Roedd hi’n wych gweld pa mor ysbrydoledig yr oedd y plant gan yr arddangosfa, y gweithgareddau a’r llyfrau y daethant â hwy gyda nhw.
“Un o fy hoff eiliadau oedd pan y dechreuodd disgybl ifanc o Gasllwchwr, heb anogaeth o gwbl, ysgrifennu ei gerdd ei hun, ar ôl darllen a gwrando ar gerdd Dylan ‘Do not go gentle into that good night’.
“Cafodd bawb gymaint o hwyl yn dathlu Diwrnod y Llyfr ac ystyried cyngor Dylan ‘i ddwlu ar y geiriau’, ac rydym yn edrych ymlaen at ddarllen y cerddi a’r straeon a ysbrydolwyd yn ystod y dydd.”
Nicola Kelly, Swyddog Dysgu, Canolfan Dylan Thomas
Os hoffech gael mwy o wybodaeth am arddangosfa Dylan Thomas, ‘Dwlu ar y Geiriau’, a chyfle i ddysgu y tu allan i’r ystafell ddosbarth, ffoniwch ein swyddog dysg, Nicola Kelly, ar 01792 463980 neu e-bostiwch nicola.kelly@swansea.gov.uk.
This post is also available in: English
